තේ වගාවේ පොහොර භාවිතය පිළිබඳ අවවාදාත්මක සටහන
තේ වගාවේ පොහොර භාවිතය පිළිබඳ අවවාදාත්මක සටහන
“තේ පොහොර” නමින් විවිධ පෝෂක සංයුතීන් ගෙන් යුත් පොහොර වර්ග වෙළඳ පොළෙහි විකිණීමට ඇති බවත්, ඒවා තේ වගාව සඳහා යොදන බවත් අප වෙත අවස්ථා කීපයකදීම වාර්තා වී ඇත. ඒ අනුව වෙළඳ පොළෙහි ඇති පොහොර මිශ්‍රණයන්ගෙන් අහඹු ලෙස ලබා ගත් සාම්පල් හා අප වෙත ලැබී ඇති එවැනි පොහොර සාම්පල් විෂ්ලේෂණය කර තත්ව වාර්තා ලබා ගැනීමේදී ඒවා බොහොමයක් තේ වගාව සඳහා භාවිතයට නුසුදුසු (ප්‍රමිතියෙන් තොර) ඒවා බව තහවුරු වී ඇත. පසට යෙදීමට නොසුදුසු සංයෝගද මෙම සමහර පොහොරවල අඩංගු බවට විද්‍යාත්මක සාක්ෂි ලැබී ඇත. විශේෂයෙන්ම අධික ලෙස සෝඩියම් (Na) අඩංගු පොහොර යෙදීම පසට හානිදායකය. එවැනි නුසුදුසු පොහොර දිගින් දිගටම භාවිතා කිරීම තේ කර්මාන්තයට මෙන්ම පාරිසරිකවද තර්ජනයක් විය හැකි බැවින් තේ පර්යේෂණ ආයතනය මගින් නිර්දේශිත පොහොර පමණක් තේ වගාව සඳහා යොදන ලෙස මින් අවධාරනය කරමු.
තේ වගාව සඳහා පොහොර නිර්දේශ ඉදිරිපත් කිරීමේදී සැළකිල්ලට ගනු ලැබෙන ඉතා වැදගත් කරුණු කීපයක් පහත සඳහන් කර ඇත.
- තේ ශාකයේ පෝෂක අවශ්‍යතාව, වර්ධක අවධිය මත රඳා පවතින බැවින් තේ වගාව සඳහා පොහොර නිර්දේශ ඉදිරිපත් කර ඇත්තේ වගාවේ ප්‍රධාන අවධීන් වන තවාන්, නොමේරූ සහ මේරූ යන ප්‍රධාන වගා අවධි තුන පදනම් කරගෙනය.
- සාමාන්‍යයෙන් නයිට්‍රජන් (N), පොස්පරස් (p), පොටෑසියම් (K), මැග්නීසියම් (Mg) සහ සල්ෆර් (S) යන පෝෂක, මිශ්‍ර පොහොරක් ලෙස පසට යොදන අතර සින්ක් (Zn) පෝෂකය පත්‍ර හරහා දියර පොහොරක් ලෙසට යෙදීම (සින්ක් සල්ෆේට් ලෙස), තේ ප ආ නිර්දේශය වේ. එයට අමතරව අවශ්‍යතාව අනුව යොදන පොහොර වල කාර්යක්ෂමතාව වැඩි කර ගැනීමටත්, පෝෂක අපතේ යාම අඩු කර ගැනීමටත් පත්‍ර හරහා යම් පෝෂක ප්‍රමාණයක් ලබා දීමද නිර්දේශ කර ඇත. උදා: කොමර්ෂල් එප්සම් සෝල්ට්, යූරියා, මැංගනීස් සල්ෆේට් (මෙම ක්‍රමය හරහා වරකට ලබා දිය හැකි පෝෂක ප්‍රමාණය සීමිතය.)
- දලු නෙලන, මේරූ තේ වගාවන් සඳහා පොහොර නිර්දේශ ඉදිරිපත් කිරීමේදී වගා කලාපය, තේ වර්ගය (බීජ හෝ රිකිලි තේ), ශාකයේ අස්වනු ප්‍රතිචාරය ආදී සාධක කිපයක් සැලකිල්ලට ගෙන පොහොර නිර්දේශ ඉදිරිපත් කර ඇහ.
- තේ වගාව සඳහා අමිශ්‍ර පොහොර ලෙස යූරියා, මියුරියේට් ඔෆ් පොටෑෂ්, එප්පාවල රොක් පොස්ෆේට් , සල්ෆේට් ඔෆ් ඇමෝනියා, කීසරයිට්, සින්ක් සල්ෆේට්, ඩයි-ඇමෝනියම් පොස්ෆේට්, එප්සම් සෝල්ට්, සල්ෆේට් ඔෆ් පොටෑෂ්, මැංගනීස් සල්ෆේට් සහ ඩොලමයිට් නිර්දේශ කර ඇත.
- ප්‍රධාන පොහොර නිර්දේශයන්ට අමතරව වගා කරුවන්ගේ ඉල්ලීම මත, තේ ප ආ හි අධීක්ෂණය යටතේ, අවශ්‍යතාව අනුව පොහොර නිර්දේශයන් ලබා දීමේ සේවාවද තේ ප ආ විසින් සිදු කරයි. උදා; ස්ථානීය විශේෂිත පොහොර නිර්දේශ (Site Specific Fertilizer Recommendations) ඉදිරිපත් කිරීම. මෙහිදී පසුගිය වාර්ෂික අස්වනු ස්වභාවය මත නයිට්‍රජන් අවශ්‍යතාවය තීරණය කරන අතර අනෙක් ප්‍රධාන පෝෂකයන් වන පොස්ෆරස් (P), පොටෑසියම් (K), මැග්නීසියම් (Mg) සහ සල්ෆර් (S) සඳහා අවශ්‍ය පොහොර ප්‍රමාණයන් පාංශු පරික්ෂාවකින් පසු තීරණය කරනු ලැබේ.
මේ අනුව තේ වගාව සඳහා තේ ප ආ විසින් නිර්දේශිත පොහොර මිශ්‍රණ පහත වගුව 1 හි සඳහන් කර ඇත. ඒ පිළිබඳ තොරතුරු දැන ගැනීම සඳහා තේ ප ආ උපදෙස් චක්‍රලේඛ (අංක SP1-SP10) පරිශීලනය කරන්න. මෙහි සඳහන් පොහොර නිර්දේශයන්ට අමතරව වෙනත් පොහොර මිශ්‍රණ තේ වගාව සඳහා භාවිතා කිරීමෙන් වළකින්න.
වගුව 1 : තේ සඳහා නිර්දේශිත විවිධ පොහොර මිශ්‍රණ සහ ඒවායේ පෝෂක ප්‍රමාණයන්
| පොහොර මිශ්‍රණය | යොදන අවධිය | පෝෂක ප්‍රමාණය (%) | ||||
| N | P2O5 | K2O | MgO | S | ||
| T 65 | තේ තවාන් | 10.5 | 10.8 | 11.1 | 3.7 | 12.7 |
| T 200 | ළපටි තේ, මව් වගා, බීජ දරන තේ | 10.3 | 6.9 | 7.5 | 3.0 | 14.8 |
| T 750 | නොමේරූ තේ සහ බීජ දරන තේ | 13.7 | 3.7 | 8.0 | 1.6 | 17.5 |
| U 330 | මේරූ බීජ දරන තේ | 18.1 | 8.6 | 18.2 | Nil | Nil |
| U 625 | පුනරුත්ථාපන තෘණ | 16.6 | 11.4 | 14.4 | Nil | Nil |
| ST/UM 400 | උඩරට හා මැදරට අඩු අස්වනු සහිත රිකිලි හා බීජ තේ | 22.5 | 6.2 | 17.6 | Nil | Nil |
| ST/LC 365 | පහතරට අඩු අස්වනු සහිත රිකිලි හා බීජ තේ | 24.7 | 6.7 | 13.6 | Nil | Nil |
| ST/UVA 435 | ඌව අඩු අස්වනු සහිත රිකිලි හා බීජ තේ | 20.7 | 5.8 | 20.7 | Nil | Nil |
| VP/UM 910 | උඩරට හා මැදරට මේරූ රිකිලි තේ | 29.7 | 3.9 | 13.2 | Nil | Nil |
| VP/LC 880 | පහතරට මේරූ රිකිලි තේ | 30.7 | 4.1 | 11.4 | Nil | Nil |
| VP/UVA 945 | ඌව මේරූ රිකිලි තේ | 28.6 | 3.8 | 14.8 | Nil | Nil |
| VP/UM1020 | උඩරට හා මැදරට වැඩි අස්වනු සහිත රිකිලි තේ | 31.4 | 3.4 | 11.8 | Nil | Nil |
| VP/LC 1075 | පහතරට වැඩි අස්වනු සහිත රිකිලි තේ | 33.5 | 3.3 | 9.3 | Nil | Nil |
| VP/UVA 1055 | ඌව වැඩි අස්වනු සහිත රිකිලි තේ | 30.3 | 3.3 | 13.3 | Nil | Nil |
| U 834 | මේරූ තේ සඳහා කීසරයිට් අඩංගු පොහොර මිශ්‍රණය | 24.0 | 3.6 | 12.0 | 3.6 | 3.4 |
| UT 752 | මේරූ තේ සඳහා සල්ෆර් අඩංගු පොහොර මිශ්‍රණය | 26.6 | 4.0 | 13.3 | Nil | 2.7 |
| T1240* | මේරූ තේ සඳහා, N ප්‍රභවය ලෙස ඇමෝනියම් සල්ෆේට් අඩංගු පොහොර මිශ්‍රණය | 16.1 | 2.3 | 8.0 | Nil | 18.7 |
*යූරියා මිල ඉහළයාම නිසා, ඇමෝනියම් සල්ෆේට් අඩංගු T1240 පොහොර මිශ්‍රණය, අතුරු නිර්දේශයක් ලෙස ඉදිරිපත් කර ඇත. මෙම පොහොර මිශ්‍රණය භාවිතා කිරීමේදී පසේ ආම්ලික බව වැඩිවිය හැකි බැවින්, කප්පාදු චක්‍රය මැදදී වුවද, පසෙහි pH අගය පරීක්ෂා කර, ඒ අනුව අවශ්‍ය ප්‍රමාණයට ඩොලමයිට් යොදා පසේ ආම්ලිකතාව නිවැරදි කර ගන්න.
සැළකිය යුතුයි: පොහොර මිලදී ගැනීමේදී මිශ්‍රණයේ අඩංගු සංයෝග වල පෝෂක ප්‍රතිශතය/අනුපාතය, නිෂ්පාදිත ආයතනයේ/පුද්ගලයාගේ තොරතුරු, නිෂ්පාදිත හා කල් ඉකුත්වීමේ දිනය ආදී තොරතුරු පිළිබඳ අවධානය යොමු කරන්න.
Total Visit : 22874